„რადიაციული ღრუბელი საქართველომდე ვერ მოაღწევს“

ბოლო დროს, სულ უფრო ხშირად ისმის კითხვა: უქმნის თუ არა რადიაციის საფრთხეს, საქართველოს „ფუკუსიმა–1“–ზე მომხდარი აფეთქებები და რამდენად საგანგაშოა იაპონიაში, ამ დროისთვის დაფიქსირებული, რადიაციული ფონის გაუარესება. ამ და სხვა საკითხებზე „პრესა.ჯი“ გარემოს დაცვის სამინისტროს ბირთვული და რადიაციული უსაფრთხოების სამსახურის უფროსს, ლევან გოგუას ესაუბრა:

– საკმარისია თუ არა საფრთხის განეიტრალებისკენ მიმართული ის ღონისძიებები, რასაც იაპონიის ხელისუფლება „ფუკუსიმა–1“–ზე ატარებს, თუ თვით ისეთ მაღალგანვითარებულ ქვეყანასაც კი, როგორიც იაპონიაა, მხოლოდ საკუთარი ძალებით არ შეუძლია საფრთხის აღმოფხვრა?

– სხვათაშორის, იაპონელები მთელი ამ ხნის განმავლობაში, სწორი მეთოდებით ებრძვიან რადიაციის გაჟონვის შესაძლებლობას. რეაქტორების შიდა წნევის მომატება იმან გამოიწვია, რომ გაგრილების სისტემა მწყობრიდან გამოვიდა. იაპონელმა სპეციალისტებმა, უწყვეტ რეჟიმში, ზღვის წყლის ჭავლით დაიწყეს რეაქტორების გაგრილება და ზღვის წყალში ბორი გაურიეს, რომელიც ნეიტრონებს ანეიტრალებს. მართალია, სრული განეიტრალება შეუძლებელია, მაგრამ ასეთ მოქმედებას შედეგი მაინც მოაქვს.

– მაგრამ, გატარებული ზომების მიუხედავად, სამი აფეთქება უკვე მოხდა…

– დიახ, აფეთქებები პირველ, მესამე და მეოთხე რეაქტორებზე გარდაუვალი გახდა. ამის პროგნოზირება წინასწარაც იყო შესაძლებელი, მაგრამ რაც მთავარია, რეაქტორები არ დაზიანებულა. შესაბამისად, პირველი აფეთქებისთანავე იაპონიის მთავრობამ, ოცკილომეტრიან რადიუსში მოსახლეობის ევაკუაცია დაიწყო, რათა მათი დასხივება არ მომხდარიყო.

– რამდენადაც ცნობილია, სამივე შემთხვევაში წყალბადი აფეთქდა. ეს რამდენად საშიშია რადიაციის გავრცელების თვალსაზრისით?

– თვითონ წყალბადის აფეთქება დახურულ ზონაში, იმდენად საშიში არ არის, რამდენადაც პროცესები, რაც ამ აფეთქებას მოჰყვება. კერძოდ, აფეთქების შედეგად ატმოსფეროში გაიფანტა რადიოაქტიური ნივთიერებები, ცეზიუმ–137 და იოდ–126. თუმცა, ჯერჯერობით არ არსებობს ინფორმაცია, თუ რა კონცენტრაციით მოხდა ამ ნივთიერებების გაფანტვა ჰაერში. სწორედ, ეს ნივთიერებები ქმნიან შემდგომ რადიაციის ღრუბელს.

– რამდენ ხანს რჩება ღრუბელი და თუ არსებობს ტექნოლოგია, რომელიც უარყოფითი შედეგების გამოწვევის გარეშე მის დაშლას უზრუნველყოფს?

– ასეთი ტექნოლოგია არ არსებობს. რადიაციული ღრუბლის გავრცელება და მიმართულება კლიმატურ პირობებზეა დამოკიდებული: საით და რა სიჩქარით დაუბერავს ქარი, როდის მოვა წვიმა და რომელი ტერიტორიის თავზე იქნება წვიმის დროს ღრუბელი…

– წვიმა, ამ შემთხვევაში სიტუაციის გაუარესების წინაპირობაა?

– რასაკვირველია. წვიმა შლის რადიაციულ ღრუბელს და, ასე ვთქვათ, დედამიწაზე გზავნის იმ მავნე რადიოაქტიურ ნივთიერებებს, რომელსაც ეს ღრუბელი შეიცავს. სწორედ ამის შედეგია, რადიაციული დაბინძურება: მცენარეების, ნიადაგის. ასევე ადამიანთა დასხივება.

– არსებობს თუ არა შანსი, რომ რადიაციულმა ღრუბელმა საქართველომდე მოაღწიოს?

– მხოლოდ თეორიული შანსი არსებობს. ეს იმ შემთხვევაში მოხდება, თუ ქარი მხოლოდ საქართველოს მიმართულებით დაუბერავს და თუკი იმ დროის განმავლობაში, რაც ღრუბელს საქართველომდე მისაღწევად დასჭირდება, წვიმა არ მოვა. ასეთი რამ, პრაქტიკულად, შეუძლებელია. ამიტომაც, დანამდვილებით შეგვიძლია ვთქვათ, რომ საქართველოს რადიაციული საფრთხე არ ემუქრება. ამას გარდა, ჩვენი ქვეყანა კავკასიის საკმაოდ მაღალი ქედითაა შემოსაზღვრული, რომელიც რადიაციული ღრუბლისთვის თითქმის გადაულახავ ბუნებრივ წინააღმდეგობას წარმოადგენს.

– მაგრამ კავკასიონმა ჩერნობილის ტრაგედიის დროს ხელი ვერ შეუშალა საქართველოში რადიაციის გავრცელებას…

– ჩერნობილის დროსაც შეუშალა, მაგრამ მაშინ რადიაცია საქართველოში, ძირითადად, ზღვის საშუალებით გავრცელდა. სწორედ ამიტომაც იყო, რომ დასავლეთ საქართველო დაზარალდა და აღმოსავლეთ საქართველომდე რადიაციამ ვერ მიაღწია. უფრო მარტივად რომ ვთქვა, რადიაცია საქართველოში ზღვით შემოვიდა და აღმოსავლეთ საქართველოსკენ დაიძრა, მაგრამ ლიხის ქედი ვერ გადალახა…

– ამ ბოლო დროს, სულ უფრო ხშირად ადარებენ ერთმანეთს ჩერნობილისა და ფუკუსიმას ავარიებს. შესაძლებელია თუ არა, ფუკუსიმაში მომხდარი ავარია იაპონიისთვის ისეთივე დამანგრეველი იყოს, როგორც ჩერნობილის ავარია აღმოჩნდა ყოფილი სსრკ–სთვის?

– ავარიებს შორის, არანაირი პარალელები არ არსებობს. ასევე, არ შეიძლება, ვისაუბროთ შედეგების მსგავსების შესახებ. თუ გახსოვთ ან წაგიკითხავთ, ჩერნობილის ტრაგედიას მთელი სამი დღის განმავლობაში მალავდნენ და ზომების მიღება მას შემდეგ დაიწყეს, როცა რადიაცია დიდ მანძილზე იყო გავრცელებული. იქ, არც მოსახლეობის ევაკუაცია მომხდარა. იაპონელებმა კი ზომების მიღება, ფაქტობრივად, აფეთქების მომენტიდანვე დაიწყეს. სხვათაშორის, თუ ახლა იაპონიაში არსებულ გამოსხივების დონეს, ჩერნობილში მაშინ არსებულს შევადარებთ, კარდინალურად განსხვავებულ მონაცემებს მივიღებთ, რადგან ჩერნობილში გამოსხივება არა სამასჯერ ან ოთხასჯერ, არამედ დაახლოებით 6.000–ჯერ აღემატებოდა დასაშვებ ნორმას.

– ორიოდე სიტყვით, იქნებ გამოსხივების დოზის სიმძლავრის ერთეულზეც გვითხრათ…

– გამოსხივების დოზის ერთეული, ზივერტია და ეს სახელი მას გერმანელი მეცნიერის პატივსაცემად ეწოდა. გაუთვითცნობიერებელი მკითხველისთვის გასაგები შედარება რომ მოვიყვანო, 1 ზივერტი 100 რენტგენის ტოლია. ახლა, ჩემს ოთახში, რადიაცია 0,07 მიკროზივერტია საათში. ნორმა საქართველოს მასშტაბით, საათში 0,07–დან 0,012 მიკროზივერტამდე მერყეობს.

– რამდენად არის შესაძლებელი, რომ იაპონელებმა რადიაციით დასხივებული ყველა ადამიანი გამოავლინონ, რათა შემდეგ უმკურნალონ?

– ბუნებრივია, დასხივებულ ადამიანს კარგა ხნის მანძილზე არაფერი ეტყობა, თუ მას სპეციალურად არ გამოიკვლევ, რადიაციას არანაირი სიმპტომი არა აქვს და მისი უარყოფითი გავლენა ორგანიზმზე წლების განმავლობაში, ეტაპობრივად ვლინდება. იაპონელები ევაკუირებული მოსახლეობის გამოკვლევას ატარებენ, მაგრამ, ვფიქრობ, რომ ყველა შესაძლო დასხივებულის გამოსაკვლევად, საკუთარი ძალები არ ეყოფათ. ამაში მათ, მთელი მსოფლიო უნდა დაეხმაროს…

წყარო:presa.ge

 

იაპონური რადიაციული ჰაერის მასების გადმოადგილება

ფუკუშიმას ატომური კატასტროფის შემდეგ, კოლნის უნივერსიტეტის პროფესორებმა, EURAD-ის პროექტის ფარგლებში (ევროპაში დაბინძურებული ჰაერის გავრცელება) მოკლევადიანი პროგნოზი (2 აპრილამდე) გააკეთეს, რა მიმართულებით შეიძლება გადაადგილდეს რადიაციული ჰაერის მასები:

მართალია, რუკა ცოტა არაორდინალურია, მაგრამ ცოტა ხანს თუ დააკვირდებით და თვალს შეაჩვევთ, ჩანს, რომ ფუკუშიმას რადიაციული ჰაერი ძირითადად ჩრდილოეთით მიემართება, განსაკუთრებულად დიდი ოდენობით ნაწილდება ამერიკაში, შედარებით ნაკლებკონცენტრირებული კი რუსეთში, ევროპასა და აფრიკის კონტინენტის ჩრდილოეთზე.

საქართველოს პოვნა ამ რუკაზე მართალია ცოტა გამიჭირდა, მაგრამ “ორ ზღვას შუა” მაინც მიგნებადია და 2 აპრილს, როგორც ჩანს, რადიაციული ჰაერი ჩვენს საჰაერო სივრცესაც გადაჭრის, რაც, მაინცდამაინც სასიამოვნო ვერ უნდა იყოს, მაგრამ სადაც მთელი მსოფლიო, იქაც ჩვენ.

საპანიკო არაფერია. ამბობენ, რადიაციული ჰაერი პირველ რიგში იოდნაკლულ ადგილებს ავსებსო და ამიტომ, იოდით მდიდარ საკვებს და იოდის ტაბლეტებს უნდა მიმართოთ საპროფილაქტიკოდო, მაგრამ წინასწარ მკვეთრი ღონისძიებების გატარება ალბათ ცოტა სათუოა.

ამიტომ, ჯობია შევასრულოთ მინიმუმი მაინც:
2 აპრილს და შემდგომ დღეებში მოვერიდოთ წვიმას და მის უშუალო შეხებას სხეულზე (შესუნთქვაც არ უნდა იყოს მთლად სასარგებლო), რომელმაც, დიდი შანსია, ღრუბლებში კონცენტრირებული იაპონური რადიაცია ჩამოგვიტანოს.

მოკლედ,
გვერდზე გადადეთ რომანტიკა და გაზაფხულის წვიმებს ამჯერად ცოტა კრიტიკულად მიუდექით 🙂

გავუფრთხილდეთ დედამიწას (R)

ბოლო რამდენიმე წელია ევროპაში ყოველწლიურად მდგრადი ენერგიის კვირეული ტარდება, წელს ეს კვირეული 11-15 აპრილს გაიმართება და პარალელურად საქართველოშიც ჩატარდება.
რადგან მდგრადი ენერგია, ენერგო ეფექტურობა, ეკონომიური განათება, ეკოლოგია – ის თემებია, რაც “ახალი ნათებისთვისაც” არანაკლებ სასიცოცხლო და მნიშვნელოვანია, კომპანიამ გადაწყვეტილება მიიღო თავადაც ჩართულიყო ამ მოძრაობაში წელს.

“ახალი ნათება” აცხადებს აქციას სახელწოდებით

“გავუფრთხილდეთ დედამიწას”

აქცია ითვალისწინებს: 15%-იან ფასდაკლებას ხრახნიან ეკონათურებზე და გრძელდება 28 მარტიდან – 16 აპრილის ჩათვლით

ჩვენ პირადად გავესაუბრეთ ახალი ნათების პიარ-მენეჯერს თათა მორჩილაძეს და ვთხოვეთ კომენტარი გაეკეთებინა ამ საკითხთან დაკავშირებით:

თათა მორჩილაძე: დედამიწის რესურსები ყოველდღიურად იწურება და თუ ჩვენ დღესვე არ ვიზრუნეთ ამის შესაჩერებლად და დასაზოგად, ხვალ სავალალო მდგომარეობას მივიღებთ.
ეს აქციაც ამ მიზნებს ემსახურება, რომ რაც შეიძლება მეტმა ადამიანმა შეიძინოს ეკო-ნათურები და გადავიდეს ეკონომიურ განათებაზე, რადგან ჩვენს ქსელში არსებული ეკო-ნათურები – რომლებიც არის ისეთი უდიდესი ბრენდების, როგორებიცაა Philips, Osram და Opple, არის 80% უფრო ეკონომიურები, ვიდრე ჩვენთვის ყველასთვის ცნობილი ვარვარების ნათურები. გარდა ამისა, ამ ნათურებს აქვთ 7-8000 საათი სამუშაო რესურსი, რაც კიდევ უფრო მეტ მომხიბვლელობას მატებს მათ.ეკოლოგიურობას რაც შეეხება, უნდა აღვნიშნო, რომ ეკო-ნათურები ნათურები არ გამოყოფენ დიდ სიმხურვალეს და CO2-ს, რაც დამახასიათებელია ვარვარების ნათურებისათვის და რაც ითვლება დედამიწაზე კლიმატის შეცვლის ერთ-ერთ მიზეზად.
ეკო-ნათურების გამოყენებით ჩვენი მოსახლეობა დაზოგავს ყოველთვიურად როგორც საკუთარი ოჯახის ბიუჯეტს, ასევე გარემოსაც.

ბოლო 2-3 კვირის მანძილზე მედიაში გავრცელდა ინფორმაცია, რომ ეკო-ნათურები საშიშია ადამიანის ჯანმრთელობისათვის, რადგან ისინი შეიცავს ადამიანის ჯანმრთელობისათვის საშიში რაოდენობით ვერცხლისწყალს.

თათა: ჩვენ ვიკვლიეთ ეს საკითხი ჩვენი მომწოდებლებისაგან და გვაქვს უკვე ზუსტი მონაცემები. ევროკავშირის დადგენილი ნორმების მიხედვით, ეკო-ნათურაში ვერცხლისწყლის შემცველობის ნორმა განისაზღვრა 5 მილიგრამით.

“ახალ ნათებაში” არის 3 მომწოდებლის ეკო-ნათურები, მათში ვერცხლისწყლის შემცველობა შემდეგნაირია:

Philips ეკო-ნათურებში 1.4 დან 2 მილიგრამამდე;
Osram ეკო-ნათურებში 2 მილიგრამამდე;
Opple ეკო-ნათურებში 2.00 დან 2.4 მილიგრამამდე.
ასე რო, ეს ნათურები შეიცავს ნორმაზე ორჯერ ნაკლებ ვერცხლისწყალს და, შესაბამისად, არანაირ საფრთხეს არ უქმნის ადამიანის ჯანმრთელობას.

თუ თქვენ ყიდულობთ ჩვენს ქსელში წარმოდგენილ, მაღალი ხარისხის, ევროპის უდიდეს ლაბორატორიებში გამოცდილ და სრულყოფილებამდე მიყვანილ, წარმოების ყველა სტანდარტის დაცვით შექმნილ ეკო-ნათურებს, ისინი ევროკავშირის RoHs (Restriction Of the use of certain Hazardous Substances) დირექტივის მიხედვით იწარმოება და, შესაბამისად, არც შეიძლება შეიცავდეს საშიშ მასალას, მათ შორის არის ვარცხლისწყალიც.

RoHs – კრძალავს ვერცხლისწყლის საშიში რაოდენობით გამოყენებას არ მხოლოდ ეკო-ნათურებში, არამედ ყველა ტიპის საოჯახო ნივთებში. ეკო ნათურების შემთხვევაში დადგენილი ნორმა არის 5 მილიგრამი.

ევროპული დიდი კომპანიები, რომლებიც აწარმოებენ იმ ეკო-ნათურებს, რომლებიც იყიდება “ახალი ნათების” მაღაზიებში, ბოლომდე იცავენ ამ წესებს და მეტიც, უფრო მეტ დამცავ ტექნოლოგიებს იგონებენ თავიანთი პროდუქტისათვის. ამიტომ ეს ნათურები ეკო-მეგობრები არიან ჩვენთვის და ჩვენი გარემოსათვის და არანაირად არ შეიცავენ ჯანმრთელობისათვის საშიში რაოდენობით ვერცხლისწყალს.

ბათუმის პორტში აღმოჩენილი რადიოაქტიური ნივთიერება სავარაუდოდ ცეზიუმ 137-ია

არსებული ინფორმაციით, ბათუმის პორტში აღმოჩენილი ნივთიერება სავარაუდოდ ცეზიუმ 137-ია. როგორც სპეციალისტები აცხადებენ, აღნიშნულ ნივთიერებას ხშირად იყენებდნენ კომუნისტების დროს სამრეწველო საქმიანობაში.

ენერგეტიკის სამინისტროდან ბათუმში საგანგებო ჯგუფი გაემგზავრა. რადიოლოგთა ჯგუფი ბათუმის პორტში ნაპოვნ რადიოაქტიურ ნარჩენებს შეისწავლიან. სპეციალისტებმა უნდა დაადგინონ რა სახისაა ნივთიერება და რამდენად საშიშია ის ადამიანის ჯანმრთელობისთვის. ჯართით დატვირთულ სარკინიგზო ვაგონში აღმოჩენილი ნივთი ახლა უკვე იზოლირებულია და უსაფრთხო ადგილზეა გადატანილი.

“დარგე შენი ხე, გაამწვანე თბილისი”

ახალი გენერალური გეგმის მიხედვით, ქალაქში რეკრეაციული ზონა მნიშვნელოვნად გაიზარდა. მწვანე ტერიტორიების მოცულობის გაზრდისა და ეკოლოგიური მდგომარეობის გაუმჯობესების მიზნით, 16 ნოემბერს თბილისში სრულიად საქართველოს კათოლიკოს–პატრიარქის, უწმინდესისა და უნეტარესის ილია მეორის ლოცვა-კურთხევით ქალაქის გამწვანების ახალი პროექტი ”დარგე შენი ხე, გაამწვანე თბილისი” დაიწყო, რომელიც დედაქალაქისა და მისი შემოგარენის გამწვანებას ითვალისწინებს.
გამწვანების ახალი პროექტი დედაქალაქში 150 000 მწვანე ნარგავის დარგვასა და მათ მოვლა-პატრონობას გულისხმობს. პროექტის ფარგლებში ამ დროისთვის 20 000–მდე სხვადასხვა ჯიშის ფიჭვის, კიპარისის, აკაციის, ცაცხვის, ნუშის, ნეკერჩხლისა და იფანის ხე თბილისელების უშუალო მონაწილეობით დაირგო. გამწვანების აქციაში მთელი თბილისი, თითოეული მოქალაქე, სტუდენტები, კორპუსის ამხანაგობები და ამხანაგობის თავმჯდომარეები ჩაერთვნენ.

ხეების დარგვის შემდეგი ეტაპი საგაზაფხულო რგვების განახლებისთანავე გაგრძელდება და თბილისის გამწვანების პროექტში ჩართვა, საკუთარი ეზოების გამწვანება და ქალაქის ეკოლოგიაზე ზრუნვა ყველა თბილისელს შეეძლება.

წყარო: http://www.useug.com

თბილისს ტრამვაი დაუბრუნდება, მაგრამ რის ფასად?

პიარაქციები და პროპაგანდა, რომელიც ე.წ. ყვითელი ავტობუსების ჩამოყვანას ახლდა, ალბათ, არავის დავიწყებია. სწორედ ამას დაუკავშირეს თავის დროზე თბილისში მიწისზედა ელექტროტრანსპორტის სრული ლიკვიდაცია. როგორც ტრამვაის, ასევე ტროლეიბუსის ხაზის ინფრასტრუქტურა მოძველებული იყო, თუმცა ბევრი მიიჩნევდა, რომ ხელაღებით მისი გაუქმება არ შეიძლებოდა, მაგრამ ეს არავის გაუთვალისწინებია. 2006 წლიდან სასწრაფოდ დაიწყო რელსების აყრა და კაბელების ჩამოხსნა. მოკლედ, დედაქალაქი ამ ტრანსპორტისგან სრულიად გათავისუფლდა. იმედია, ყვითელი ავტობუსების ეპოპეაც ყველას გვახსოვს და ზედმეტად აღარ შეგაწყენთ თავს ამაზე ლაპარაკით, მაგრამ შეგახსენებთ, რომ პრეზიდენტმა მიხეილ სააკაშვილმა არაერთხელ გამოთქვა უკმაყოფილება ამ ტრანსპორტის მუშაობით, დღეს კი ბევრი ავტობუსი ავარიულობის გამო უკვე აღარ მუშაობს. მერიაში ისიც ითქვა, რომ ამ ავტობუსების მოვლა-პატრონობა ძვირი ჯდება. შესაბამისად, ხელისუფლება ავტობუსით მგზავრობის გაძვირების ერთ-ერთ მიზეზად ამასაც ასახელებს. ამასთანავე, დღემდე ვერ მოწესრიგდა მარშრუტების იმგვარი განრიგით დაგეგმვა, რომ მოქალაქეებს ქალაქში გადაადგილებისას პრობლემები არ ექმნებოდეთ. დედაქალაქის ხელმძღვანელობამ ამჯობინა, პრობლემების გადაწყვეტის ახალ გზას არ დასდგომოდა, სატრანსპორტო ინფრასტრუქტურის შესაქმნელად კარგად დავიწყებული ძველი ტრამვაი გაეხსენებინა. როგორც ამბობენ, როგორც სხვა ბევრი რამ, ეს იდეაც მიხეილ სააკაშვილს ეკუთვნის.

ხელისუფლება თბილისში ტრამვაის ხაზის აღდგენას რომ აპირებს, იმ პროექტიდანაც კარგად ჩანს, რომელიც ორიოდე დღის წინ ქალაქის მერიამ საზოგადოებას წარუდგინა. პრეზენტაციას მერიის საქალაქო სამსახურების ხელმძღვანელებთან ერთად სატრანსპორტო დაგეგმარების ფრანგული კომპანია “სისტრას” წარმომადგენლებიც დაესწრნენ. როგორც მერიის ტრანსპორტის სამსახურში ამბობენ, წარმოდგენილი პროექტის ფარგლებში ჩატარდება თბილისში ტრამვაის ხაზის მარშრუტის დასადგენი კვლევა, რომლის მიხედვითაც გაკეთდება სატრანსპორტო ქსელის ოპტიმიზაციის, მგზავრობის ხასიათის, მგზავრთა ნაკადისა და მოქალაქეების სამგზავრო ჩვევების ანალიზი.

საინტერესოა, რომ წარმოდგენილი პროექტით კვლევის ჩატარება ერთი მილიონი დოლარი დაჯდება. ბუნებრივია, ჩნდება კითხვა – რა დაჯდება დედაქალაქში ამ სატრანსპორტო ინფრასტრუქტურის განვითარება და აქვს თუ არა ქვეყანას დღეს ამის ფუფუნება? საქმე ის არის, რომ ამ ინფრასტრუქტურის ნულიდან შექმნა და ამოქმედება, მსოფლიო გამოცდილების გათვალისწინებით, ძალიან ძვირი სიამოვნებაა. ამაზე ცოტა ქვემოთ, მანამდე კი გეტყვით, რომ პროექტის ფარგლებში თბილისში რვა ათასი ოჯახი გამოიკითხება. ეს პროცესი 26 იანვრიდან დაიწყო და აპრილის ბოლომდე გასტანს. კვლევას კომპანია IPM ატარებს. თბილისის მერია თხოვნით მიმართავს მოქალაქეებს, მხარი დაუჭირონ IPM-ის წარმომადგენლებს და აქტიურად ჩაერთონ კვლევის პროცესში. პროექტის ფარგლებში უნდა მოხდეს ტრამვაის ხაზის პროექტის ტექნიკურ-ეკონომიკური დასაბუთება, გარემოზე ზემოქმედების განსაზღვრა, ასევე სატენდერო დოკუმენტების მომზადება და პროექტის ხარჯთაღრიცხვის გაკეთება. ამიტომაც მერიაში ჯერჯერობით თავს იკავებენ იმ სავარაუდო თანხის დასახელებაზე, რაც ტრავმაის ხაზის აღდგენას დასჭირდება, არაფერს ამბობენ იმაზე, როდისთვის იგეგმება თბილისში ტრამვაის ხაზის ამოქმედება. სპეციალისტები ვარაუდობენ, რომ ეს პროცესი, სულ მცირე, 4-5 წელიწადს გასტანს, თუმცა ჩვენი ხელისუფლების სულსწრაფობის ამბავი არახალია და მიხეილ სააკაშვილმა შესაძლოა, ყველაფრის დასრულება თავის მეორე საპრეზიდენტო ვადაშივე მოინდომოს.

თავის დროზე, როდესაც თბილისში ტრამვაი გაუქმდა, მერიის მოხელეები ამბობდნენ, – 21-ე საუკუნეში რა დროს ტრამვაია, ეს შეშვენის ჩვენს დროსა და ეპოქასო?.. ეს განცხადება მაშინვე სასაცილო იყო, თუმცა ის უფრო სასაცილოა, ლამის იგივე ხალხი დღეს რომ ელექტროტრანსპორტის დადებით მხარეებზე ლაპარაკობს. მერიაში აცხადებენ, რომ ტრამვაის აღდგენა განპირობებულია შემდეგი ფაქტორებით: ეკოლოგიურად უსაფრთხოა, სწრაფია, იაფი და ლამაზი.

შეუძლებელია არ დაეთანხმო, მაგრამ დგება რამდენიმე საკითხი. პირველი – როგორც უკვე ვთქვით, ტრამვაით მგზავრობა იაფია, მაგრამ მისი ინფრასტრუქტურის აშენება ძალიან ძვირი ჯდება. მხოლოდ ერთ მაგალითს გეტყვით: თანამედროვე ტრამვაის ვაგონების ფასი 580.000 დოლარიდან 2.500.000 ევროს შორის მერყეობს. ვფიქრობ, მეტად შთამბეჭდავი რიცხვებია, მით უფრო, ქვეყანაში დღეს არსებული სოციალურ-ეკონომიკური ვითარების გათვალისწინებით. იმედია, ხელისუფლება ავტობუსებივით ნახმარი ვაგონების ჩამოტანას არ გეგმავს. არის ერთი პრობლემაც, თბილისის ქუჩები საკმაოდ ვიწროა და ტრანსპორტით უკიდურესად გადატვირთული, ტრამვაის ხაზი უფრო ხომ არ შეაფერხებს მოძრაობას? გარდა ამისა, საკითხავია, თბილისის ცენტრალურ მაგისტრალებზე არაერთხელ აყრილი და დაგებული ასფალტი კიდევ რამდენჯერ უნდა აყარონ? მით უფრო, რომ იმ ფართო ქუჩებში, სადაც უპრიანი იქნებოდა ტრამვაის ხაზის გაყვანა, საკმაოდ ფართო, ე.წ. მწვანე ზოლებია.

წყარო: გაზეთი ”ყველა სიახლე”

“რა დარჩება გარემოს დაცვის სამინისტროსგან? – მხოლოდ აბრა!”

ახლახან პრემიერ-მინისტრმა ნიკა გილაურმა გარემოს დაცვისა და ბუნებრივი რესურსების სამინისტროს მოსალოდნელ რეორგანიზაციაზე ისაუბრა: გარემოს დაცვის სამინისტრო სახელმწიფო მინისტრის აპარატად ჩამოყალიბდება, ენერგეტიკის სამინისტრო კი ენერგეტიკისა და ბუნებრივი რესურსების სამინისტროდ გარდაიქმნება.

ამ ნოვაციასა და მწვავე ეკოლოგიურ პრობლემებზე გარემოს დაცვის ყოფილი მინისტრი, თანათავმჯდომარე საქართველოს მწვანეთა მოძრაობისა “დედამიწის მეგობრები” ნინო ჩხობაძე გვესაუბრება:

– კლიმატის აშკარა ცვლილებამ, სხვა პრობლემებზე რომ აღარაფერი ვთქვათ, მსოფლიო უდიდესი გამოცდის წინაშე დააყენა. ეკოლოგიურმა, გარემოსდაცვითმა საკითხებმა კიდევ მეტი სიმძაფრე შეიძინა, განა შეიძლება ამ დროს ხელისუფლება გარემოს დაცვის სამინისტროს გაუქმების, ანუ როგორც თვითონ აცხადებენ, რეორგანიზაციის საკითხს აყენებდეს? ეს ნიშნავს, რომ სახელმწიფო გარემოს დაცვას პრიორიტეტულ დარგად არ მიიჩნევს. რა რეორგანიზაციაზეა საუბარი?! რატომ უნდა იყოს გარემოს დაცვა გერის როლში?! დაგეგმილი ცვლილებების განხორციელების შედეგად, ეკონომიკისა და მდგრადი განვითარების სამინისტროდან რესურსების რეგულირება, ლიცენზირება და აუქციონების ჩატარება ენერგეტიკის სამინისტროს პრეროგატივა გახდება, სწორედ ის იქნება ბუნებრივ რესურსებზე პასუხისმგებელი უწყება, რომელიც ამასთანავე, ბუნებრივი რესურსების მომხმარებელია.

ასევე გაუგებარია, როგორ უნდა შეიქმნას სახელმწიფო მინისტრის აპარატში პატარა რგოლი, რომელიც გარემოს დაცვის სამინისტროს ფუნქციას შეასრულებს? სინამდვილეში, ეს გარემოს დაცვის სამინისტრო არ და ვერ იქნება, რადგან ანბანური ჭეშმარიტებაა, რომ ამ სამინისტროს, უპირველესად, ბუნებრივი რესურსების რეგულირების მექანიზმი უნდა ჰქონდეს. ჩვენში რატომღაც ეშინიათ სიტყვის “ლიცენზირება”, არადა, სწორედ ამ გზით უნდა მოხდეს რესურსების კვოტირება, რეგულირება. გარემოს დაცვა საკმაოდ ეკონომიკური დარგია და თუ ყველა ფაქტორს გავითვალისწინებთ, სწორად გავთვლით, მინიმალური დანახარჯით მაქსიმალურ მოგებას მივიღებთ. თუ რომელიმე მშენებლობის ან სხვა პროექტის განხორციელებისას არ გავითვალისწინეთ გარემოს დაცვითი მოთხოვნები, შედეგი, შესაძლოა, უმძიმესი აღმოჩნდეს.

– უფრო კონკრეტულად, გარემოსდაცვითი მოთხოვნების უგულებელყოფის გამო რომელ გახმაურებულ პროექტს შეექმნა პრობლემები?
– მთელი სიმწვავით არავის დაუსვამს კითხვა: რატომ ჩაინგრა გლდანის ხიდი, რასაც მსხვერპლი მოჰყვა? ამის მიზეზი იყო ის, რომ ხიდი 1950-იან წლებში აშენდა, პროექტის ავტორებმა არ გათვალეს, როგორი იქნებოდა მისი ზემოქმედება ორ მომდევნო ხიდზე…

თუ გვინდა შევინარჩუნოთ საქართველოს უნიკალური ბუნება, მისი მთა-ბარი, ტყე, წყალი, გარემოს დაცვა ქვეყნისთვის პრიორიტეტული უნდა იყოს და, სულ მცირე, ის უწყება მაინც გვქონდეს, რომელსაც მარეგულირებელ-მაკონტროლებელი ფუნქცია დაეკისრება. ახლახან გაცხადებული ე.წ. რეორგანიზაციით კი ამგვარი ინსტანცია აღარ იარსებებს. მხოლოდ საერთაშორისო კონფერენციებზე სიარული და იქ ხმამაღალი განცხადებები, რომ ბუნებას ვიცავთ, ვერაფერს ცვლის. ახლა დიდი პიარკამპანიაა გაჩაღებული თბილისის შემოვლითი რკინიგზის მშენებლობაზე, რომელიც პრეზიდენტმა პარლამენტში გამოსვლის დროსაც ახსენა, თუმცა, სპეციალისტთა ნაწილი კატეგორიულად ვითხოვთ პროექტში არსებითი კორექტივების შეტანას, წინააღმდეგ შემთხვევაში, შესაძლოა, სავალალო შედეგამდე მივიდეთ…

– თუმცა, არასამთავრობო სექტორის, მოსახლეობის პროტესტმა თუნდაც “მზიურის” ტერიტორიაზე ესტაკადის, “დინამოს” კორტებსა თუ თბილისის სკვერებში გაჩაღებული მშენებლობის გამო მიზანს ვერ მიაღწია…
– როგორც ჩანს, საზოგადოება არასაკმარისად აქტიური იყო, თუმცა, ხელისუფლების, თბილისის მერიის წარმომადგენლებიც შეუვალი აღმოჩნდნენ. რას ითხოვდნენ განსხვავებული მოსაზრების ადამიანები? უნდა შეფასებულიყო, რა ზემოქმედებას მოახდენდა მაგისტრალი ამ ტერიტორიის ლანდშაფტზე. მშენებლობისას ყველა ეს ფაქტორი რომ გაეთვალისწინებინათ, აღარ დასჭირდებოდათ ბადის გაკვრა კლდეზე, რის გამოც მილიონობით ლარი დაიხარჯა. აი, კიდევ ერთი კლასიკური მაგალითი, რა მოჰყვება გარემოსდაცვითი ფაქტორების გაუთვალისწინებლობას, სიჩქარესა და ფაციფუცს.

– ხელისუფლება ხშირად აპელირებს დასავლურ გამოცდილებაზე, გარემოს დაცვის სამინისტრო ყველა ევროპულ ქვეყანაშია?
– რა თქმა უნდა. შესაძლოა, სახელწოდება სხვა იყოს, მაგრამ ფუნქციები და რეგულირების მექანიზმები ყველგან აქვს. არსად მოსვლიათ აზრად, რომ აღსრულების მექანიზმი ერთ უწყებაში იყოს, პოლიტიკას კი მეორე განსაზღვრავდეს. რა დარჩება სამინისტროსგან? – მხოლოდ აბრა!

– გავრცელებული ხმებით, ამ გადაწყვეტილებას პოლიტიკური საფუძველიც აქვს – გაპრემიერებას მალე ვერა ქობალიას უპირებენ და ნიკა გილაური ენერგეტიკის და გარემოს დაცვის სამინისტროების გაერთიანებით ცდილობს უსაფრთხო სათადარიგო აეროდრომი შეიქმნას…
– როცა ყბადაღებული ლიცენზირების ფუნქცია გარემოს დაცვის სამინისტროდან ეკონომიკის სამინისტროში გადავიდა, აგვიხსნეს, რომ ეკონომიკის სამინისტრომ ეს ფუნქცია, როგორც ქონების განმკარგავმა უნდა იტვირთოს, დღეს რატომღა გადაეცემა იგი ენერგეტიკის სამინისტროს, გაუგებარია. საკითხი ასე დგას: ერთ დღეში ამოვიღო ყველა რესურსი და გარშემო ყველაფერი დავანგრიო, თუ ნაწილ-ნაწილ ამოვიღო ისე, რომ გარემოს ზიანი არ მიადგეს?

წყარო: გაზეთი ”ყველა სიახლე”

როდის დარგავენ ხეებს აღმაშენებლის გამზირზე?

თბილისის ერთი-ერთი უძველესი და ულამაზესი ქუჩა – დავით აღმაშენებლის გამზირი, ყოფილი პლეხანოვი, თითქმის განახლებულია.

თბილისის მერიამ აღმაშენებლის გამზირის სარეაბილიტაციო სამუშაოები ორი წლის წინ დაიწყო და ამჟამად პროექტ “ძველი თბილისის ახალი სიცოცხლის” მეორე ეტაპი მიმდინარეობს. როგორც მერიის პრესსამსახურში გვითხრეს, პროექტის მესამე ეტაპის პირობები მზადდება და საზოგადოებისთვის უახლოეს ხანებში გახდება ცნობილი.

“პლეხანოველებს” ახარებთ განახლებული უბანი, მაგრამ ძალიან შეწუხებული არიან თითქმის საუკუნოვანი ჭადრის ფესვებიანად ამოძირკვის გამო. როგორც მერიაში გვითხრეს, აღდგენითი სამუშაოებისას გაირკვა, რომ სახლების დიდი ნაწილი საკმაოდ მძიმე მდგომარეობაშია. თითოეული მათგანისთვის აუცილებელი იყო საძირკვლის გამაგრება, კედლების მოჭიმვა, ხეების ტოტები და ფესვები კი აზიანებდა შენობებს და ხელს უშლიდა შიდასაკომუნიკაციო ქსელის მუშაობას.

აღმაშენებლის გამზირის მოსახლეობა ამბობს, რომ ქარი აქ ყველაზე ნაკლებად იგრძნობოდა, ახლა კი მთელი გამზირი უდაბნოსავითაა და ისედაც მტვრიან და ტრანსპორტით გადატვირთულ ქუჩაში სუნთქვა შეუძლებელია. ყველაზე მეტად კი ზაფხულის დადგომის ეშინიათ: თბილისის ერთ-ერთ ყველაზე “ჩავარდნილ” ადგილად ცნობილ უბანში ქუჩაში გამოსვლა ალბათ შეუძლებელი გახდება.

ნანუკა ზაქარეიშვილი, მერიის მედიასთან და საზოგადოებასთან ურთიერთობის სამსახურის თანამშრომელი:
– აღმაშენებლის გამზირის სრული რეაბილიტაციის დასრულებისთანავე დაიწყება ხეების დარგვა, ეს იქნება რუბინიები და კატალპები. ამ ჯიშის ხეები შეგიძლიათ ნახოთ რუსთაველის გამზირზე, “ლაღიძის წყლების” წინ. არადა, დავით აღმაშენებლის გამზირის რეაბილიტაცია თამარ მეფის გამზირიდან – ზაარბრიუკენის მოედნამდე მონაკვეთის რეკონსტრუქციას გულისხმობს.

მანამდე კი გამზირის თავზე გამონაბოლქვის ღრუბელი დგას. პროექტის ავტორების თქმით, ჭადარი ალერგიას იწვევს და მისი ჩანაცვლება დეკორატიული ხეებით ამ მიზეზითაც გადაწყდა… თუმცა, “მოერევა” თუ არა ახალი, ჩვენთვის უცხო და ძვირფასი ხის ჯიშები ეკოლოგიურად ისედაც დაბინძურებულ აღმაშენებლის გამზირს, ჯერჯერობით არავინ იცის.

წყარო:გაზეთი ”ყველა სიახლე”

ტელეფონების ყველაზე “მწვანე” მწარმოებლები

“მწვანე” კომპანიათა სამეულში, რომლებიც ეკოლოგიას ყურადღებას ყველაზე მეტად უთმობენ, Apple, LG და Nokia შევიდნენ.

კომპანია IDC-ის ჩატარებულმა კვლევებმა აჩვენა, რომ კორპორაცია Apple, რომელიც სმარტფონ iPhone-ს აწარმოებს, მობილური აპარატურის მწარმოებლებს შორის ეკოლოგიურობით ყველაზე მეტად გამოირჩევა. აღსანიშნავია, რომ ეს კორპორაცია მოძველებული აპარატურის უტილიზაციის პროგრამას 95 ქვეყანაში ახორციელებს, სადაც კი თავისი პროდუქციის რეალიზებას ახდენს.

რეიტინგში მეორე ადგილი კომპანია LG-ს მიაკუთვნეს, მესამეზე კი Nokia აღმოჩნდა, რომელიც ახალი ტელეფონების წარმოებაში ცდილობს, გადამუშავებული მეორადი ნედლეული მაქსიმალურად გამოიყენოს.

წყარო:lifenews.ru

აქცია – “დარგე ხე – გაამწვანე შენი გარემო!” გრძელდება

“დარგე ხე – გაამწვანე შენი გარემო!” აქცია გრძელდება.
გარემოს დაცვისა და ბუნებრივი რესურსების მინისტრმა, გოგა ხაჩიძემ დღეს გამწვანების ყველაზე მასშტაბური აქციის გაგრძელებასთან დაკავშირებით ბრიფინგი გამართა.
როგორც მინისტრმა განაცხადა, აქციის განმავლობაში გაზაფხულზე დედაქალაში 100 ათასამდე სხვადასხვა ჯიშის ნერგი დაირგო. სამინისტროს ინიციატივით, დარგვის სეზონის მოახლოებასთან დაკავშირებით აქცია დღეს განახლდება.
დედაქალაქში ერთი თვის განმავლობაში სპეციალური მანქანა იმოძრავებს. მასზე განთავსებული ბილბორდი მოსახლეობას გამწვანების აქციის შესახებ მიაწვდის ინფორმაციას. სამინისტროს სანერგე მეუნეობაში სპეციალურად გამოყვანილ (იფანი, ნეკერჩხალი, საპნის ხე, თრიმლი, ველური ნუში, აკაცია, ფშატი) ნერგებს მოსახლეობა უსასყიდლოდ მიიღებს და დარგვის წესებს ადგილზე გაეცნობა. შემოდგომის აქციაზე დედაქალაქის მასშტაბით 200 000 ნერგი დაირგვება.
დღესვე მინისტრი ვარკეთილის II მკრ-ნს ესტუმრა, სკვერის გამწვანების სამუშაოებში მიიღებს მონაწილეობას.

წყარო:alasania.ge